近視男注重愛撫
根據非正式調查統計，家陣10個港人中，約6個有近視，而喺面相學嚟講，原來近視都會影響運程，但主要係啲近視超過500度嘅朋友。古時未發明眼鏡，深近視嘅人睇書，需要貼到好埋，相書稱為「鼻書」，就係用個鼻嚟睇書，原來呢種人會有官運，他朝好有機會有功名。
但由於佢哋成日都睇嘢唔清楚，所以做決定前，好多時都係斷估，少年時讀書運唔錯，但成年後事業運只係一般，發展有限。至於妻子大多數都係樣子平庸，但由於為人和善，要求唔多，所以夫妻運反而好好，好多時都可以白頭到老，兒女成群。
而性愛方面，由於佢哋視線不清，所以唔會追求美醜或者視覺感官，相反會十分重視愛撫環節，所以前奏工夫一定做到足。加上進攻時不徐不疾，能令伴侶較易到達高潮境界，但家陣有眼鏡戴又可以做激光矯視，情況就會有少少唔同。