貪心姨仔
肥強老婆有個細妹,由於係么女,故此娘家都好疼錫佢。每年新年,肥強呢個姨仔都會從澳洲返嚟過年,兼且住喺佢哋屋企。第一年,姨仔返嚟嘅時候,佢見到肥強買咗部新款MP3,就話:「姐夫,你部MP3好新款喎!唔知可唔可以……」肥強知姨仔想點,但就唔想送畀佢。點知老婆就話肥強小氣,結果姨仔離港返澳洲嘅時候,就順手攞走咗部MP3。
第二年,姨仔又返嚟過年,佢見到肥強買咗部新款超薄型手提電腦,佢就同肥強講:「姐夫,你部手提電腦係新型號喎!唔知可唔可以……」肥強知道姨仔想攞走佢部手提電腦,老婆示意肥強送畀佢,最後姨仔又拎走咗部手提電腦。
到咗第三年,呢次姨仔見到肥強嘅時候,就怕怕醜醜咁同肥強講:「姐夫,你份人好似唔錯喎!唔知可唔可以……」此時肥強立即望住老婆,一臉期待咁等對方會再話佢小氣!