(目及)到舉旗
雖然廣州亞運已經閉幕，但近日仍然有一單同亞運選手有關嘅新聞於網上熱炒，而事件又係同禮儀小姐有關。話說喺早前嘅亞運棒球決賽，南韓隊以9:3打敗咗大熱門嘅中華台北隊。棒球比賽喺中港兩地唔係有太多Fans，所以決賽當日都冇乜新聞報道，但事後，有一輯名為「韓國選手緊盯禮儀小姐」嘅照片出街，即時引起網民注意，而且引發熱烈討論。
網民揶揄
話說南韓選手贏得金牌，喺等候頒獎嘅時候，竟然對一班禮儀小姐十分感興趣，部分隊員更(目及)到側晒頭、擘晒口、定晒眼，其中一位手持迷你國旗嘅隊員，因為雙手剛好放喺下半身敏感部位前，更被網民揶揄佢好似睇到有反應咁，忍唔住要升旗致敬。
內地有唔少網民都係衞道之士，得知消息後，都齊聲譴責選手們行為不當，更有網民用色狼或者色鬼嚟形容佢哋。但亦有撐佢哋嘅網民話，禮儀小姐套「行雲流水服」實在太性感，用薄如蟬翼嚟形容都唔誇張，幾乎薄到連內衣褲係乜嘢款式都睇得一清二楚，又難怪一眾血氣方剛嘅選手睇到眼凸凸嘅！
其實問心嗰句，男人(目及)女好平常，但呢幾位運動員可能(目及)得太過張揚，先會引嚟話柄。而且喺呢種場合，就算真係想(目及)女，都要顧吓禮儀，唔應該太着迹囉！