婚後性生活淡如水

照中國曆學嚟睇，今年虎年屬於盲年，不宜嫁娶，但係身邊好多親戚朋友都趕住喺今年結婚，好似呢個月就收到幾張紅色炸彈喇！參加婚禮見到一對璧人結為佳偶，自己就依然隻影形單，而新老爺或新奶奶仲要潤多一句：「幾時輪到你呀？」問咁多做乜呀？有好女仔就拿拿聲介紹嚟識啦！當然，我天生樂觀，唔會因為未搵到另一半而唔開心，正所謂有得必有失，睇見兄弟結咗婚之後，自由被剝削，呢個時候我就會同自己講：「Max仔唔好怨，你睇吓某君婚後連落酒吧嘅自由都冇呀！」事實上，男人婚後唔止冇晒自由，連性生活都冇晒刺激呀！

偷食尋刺激

英國網站Lovinglinks訪問咗接近2,000名已婚男女，結果發現有59%嘅受訪者認為婚後嘅性生活比以前差；亦有接近6成人表示，婚後嘅性生活冇晒趣味，平淡如水，事關每日都見住同一個異性，兩人由當初熱戀嘅情侶，漸漸已變成感情要好嘅朋友。

而為咗改善性生活質素，有5%嘅受訪者表示會嘗試尋找一夜情。另外，有4%受訪者表示已經透過一夜情，去令自己嘅性生活得到滿足。所以為咗自己嘅性福着想，我都係唔結婚喇！