董雯名模風範

曾於網上睇見有人將日本名模與中國名模作比較，老實講，兩者根本唔能夠相提並論，事關喺日本人心目中，名模通常係啲成熟又經驗豐富嘅模特兒，而中國嘅名模就會以獎項而定，喺大型比賽中獲獎愈多，知名度愈高，就可以歸類為名模，呢次介紹嘅董雯就係其中一個好例子。

表現專業

董雯之所以成為模特兒，係因為一份兼職。話說喺2004年，當時佢仲係一名學生，暑假期間回家鄉濟南探親，咁啱遇着一間知名模特兒公司舉辦世界模特兒大賽，於是阿妹就自薦做雜工，幫模特兒換衫、執頭執尾咁，原本只為賺番些少錢幫補學費。期間被主辦單位嘅高層睇中，認為以佢嘅條件絕對可以喺模界有一番作為，於是就邀請佢參加埋一份，結果阿妹不負眾望，成為該次比賽嘅十佳模特兒，以及得到最佳身材獎。作為一個毫無經驗嘅新人，呢個成績都算有交代。不過，董雯似乎並未感到滿足，佢於2006年再度出擊，參加同一個比賽，更憑着出色嘅表現勇奪冠軍，從此走上名模之路。

獲獎後，董雯去到北京發展，又曾到過日本短期工作。入行6年以來，所累積嘅經驗，令阿妹變得更加成熟同專業，就算着透視裝行內衣騷亦一樣冇Say No，同外國模特兒睇齊，果然有名模風範。

董雯Profile

年齡：23歲

身高：5呎8吋

三圍：35D-24-34