東洋版神奇女俠

美國漫畫中嘅超級英雄，真係多到10隻手指都數唔晒，除咗有成日畀人拍成電影嘅超人、蜘蛛俠、蝙蝠俠等，仲有個女性英雄，佢就係身材Fit到爆，外形又勁Sexy嘅神奇女俠嘞！

神奇女俠嘅真名其實叫做戴安娜，佢出身於亞馬遜（唔係真嘅亞馬遜森林，而係漫畫虛構出嚟嘅地方），係一個傳說只有女性，並擅於戰鬥嘅部落公主。話說有個美國空軍因意外誤墮亞馬遜，戴安娜作為該種族嘅部落大使，於是將呢位空軍送返美國。喺出發前，佢得到神靈送嘅一條可以令人講真話嘅繩索同刀槍不入嘅手鈪，擁有超能力嘅佢更係刀槍不入，同可以任意喺天空飛翔，從此成為正義聯盟中重要嘅一員。

以前嘅神奇女俠，藍眼睛加上誇張身材，外形相當重西洋味，但今次落喺日本模型設計師手中，身材雖然仲係咁澎湃，但面容輪廓仲多咗股東方女性美。此外，隨模型仲會附送佢嘅專用繩索一條，配合埋忠於原著嘅性感衣着，絕對係一個值得收藏嘅佳作！

原型製作：鈴木洋平　全高：約240mm　售價：¥6,510（約HK$605）　預定發售日：2011年4月