掃黃成績如何，巿民同網友都心裏有數，但最感意外嘅，就係福州警方竟然出動高科技設備嚟幫助掃黃。某次喺掃蕩一間音樂會所時，一馬當先嘅警員，一衝入去就拔出類似手槍嘅物體，記者初時都以為佢拔槍出嚟控制場面，但睇真啲，支手槍上面竟然有條天線！

無所遁形

原來呢支槍叫做「摩爾探測儀」，係用嚟檢測現場有冇毒品反應嘅，記者真係大開眼界，讚賞福州警方設備之先進，雖然當時並冇收穫，但喺記者朋友眼中，總算有新聞可寫。原來，高科技裝備唔止呢支「偵毒手槍」，福州唔少夜場都安裝咗「治安管理訊息系統」。唔少人都以為佢只係一個普通嘅閉路電視系統，但原來亦係高科技產品，係警方特別推薦畀夜場使用。

所有員工都獲發一張IC卡，表面係用嚟登記上落班時間，但原來當員工一打卡後，閉路電視同電腦就會跟蹤員工嘅一舉一動，同時亦會識別客人同埋非員工嘅人士，當警方查牌時，一按電腦，在場所有人嘅身份都可分辨出嚟，特別係一啲非職員嘅夜場囡囡，佢哋喺場入面做過乜都可以一清二楚，無所遁形。福州警方有高科技幫手掃蕩夜場，以後啲場想作反就真係難上加難喇！