本文重點
台灣o靚模向來「周身刀」，好似呢次介紹嘅林欣蓓（蓓蓓）咁，一時做吓Show Girl，一時又做吓電視節目嘅助理主持，仲拍埋廣告，十足全能模特兒咁款，認真犀利。早前佢更突然改變形象，收起堅挺美乳，原來係為轉戰樂壇做準備。
轉戰樂壇
介紹過咁多台灣o靚模，娟娟發現咗一個現象，就係大部分女仔演出時都會袒胸露臂，毫不吝嗇自己嘅美好身材。無可否認，台灣娛樂圈向來比較開放，好多電視節目嘅美女助理主持，每每例牌露罅騷長腿。當然，有料唔怕露，更何況o靚模為博人氣，犧牲色相亦視作等閒，直到有番咁上下知名度，先會收起性感。
正如索女蓓蓓咁，樣貌標致可人，更擁有一對34吋美乳，而且幾乎每次演出都會性感登場。早前佢想轉型做歌手，走咗去參加《超級星光大道》。為咗以全新形象示人，佢更將皮膚曬到呈黝黑色，誓要令觀眾重新認識佢喎！