室內進行

枕頭大戰喺外國流行咗一段日子，活動有啲似快閃黨，搞手喺網上約好時間地點，當幾百人同時出現，枕頭大戰就一觸即發。呢個活動由06年開始傳到中國，喺廣州、青島、上海分別有網站同會址，09年全國性枕頭大戰組織亦正式成立。

但响內地大街大巷咁進行枕頭大戰嘅話，一定會畀人拉，於是改喺室內進行，但能夠容納幾百人嘅場地，真係唔多，惟有向酒吧或俱樂部打主意，但昂貴嘅場租就成為搞手最頭痛嘅問題，想解決就要搞搞新意思，吸引更多人參加，然後徵收入場費拉上補下。

延長時間

搞手將活動性質變通一下，由原本嘅即興活動，變為交友聚會，又強調與會者可透過枕頭大戰紓解壓力，而活動時間亦由原來十零分鐘，延長至三個鐘，以方便參加者認識同接觸異性。

大會怕啲男仔唔主動，特別安排枕頭大使，帶領佢哋玩遊戲，熱身完再玩枕頭大戰，自然就會玩得更投入。呢個變咗質嘅枕頭大戰活動，受到內地後生仔女嘅歡迎，相信日後會愈嚟愈多人參與。