大時大節，喺日本「婚活」突然勁流行，婚介公司勁賺，男女又搵到心儀目標，可謂雙贏局面。之不過「婚活」只適合有穩定收入嘅男女，而一班在職貧窮嘅後輩，分分鐘連自己都養唔掂，結婚根本就係妄想！因此「亂活」應運而生，畀機會佢哋釋放工作壓力，解決性需要！

逼爆房間

現時喺東京舉行嘅「亂活」可謂多不勝數，只要登入成人網站，隨時可發現以「集合素人」為題嘅活動，懶理男女樣貌好醜，只要你性能力健全就可以參加。但為怕有關方面檢舉，因此發起人絕不會提及活動內有性行為發生，而只會交代所有參加者屆時將有酒會及群體遊戲玩。

喺一間約五百多平方呎嘅酒店套房內，逼滿近三十位男女，話係正經派對都冇人信。而活動一開始，已無需多作解釋，大家各自拎起酒杯暢飲，進入狀態後就可以開始活動！

首次嘗試

有玩過「亂活」嘅女參加者希志今年只得廿二歲，本身係一名售貨員，曾經出演過成人AV，但最終冇公司肯同佢簽約。一個人喺東京生活，冇家人、朋友少，亦冇拖拍，阿妹話自己嚴重缺乏溫暖：「好空虛，每日放工就返屋企，對住四堵牆發呆，人生冇晒意義！」

城市人容易感到空虛寂寞，亦容易做錯事，約一年前，希志開始第一次「亂活」：「第一次感覺好驚，喺朋友介紹下，上網站登記，收到一個密碼，然後致電網主，講出密碼確認後，對方就透過短訊發送時間地點畀我。記得當晚去到酒店門口時有諗過退縮，但喺朋友慫恿下，膽粗粗一試！」

希志表示，入房後發覺大部分男士同自己差不多年紀，不少更屬有型有款類型，經過了解至知道對方因為收入唔高，所以搵唔到伴侶，惟有參加「亂活」解決需要！

紓解壓力

希志話參加完「亂活」，令佢人生第一次感到實在，因為在場男士大部分都係佢鍾意嘅類型，所以做得零舍投入！之後每次有「亂活」活動，希志都會主動參加，甚至邀約其他同事一齊玩！

希志表示佢對「亂活」已經無法抽身：「不經不覺已經玩咗超過十次，試過有參加者約我單獨出嚟玩，但過程一啲都唔享受、唔刺激，所以每當覺得空虛寂寞，我就會參加『亂活』，玩完之後即刻成個人開心晒，連工作壓力都拋諸腦後！」