本文重點
世界各地有無數度假村，但可以提供畀天體愛好者自由活動就冇幾多個。而喺德國旅遊勝地黑森林山區中心，就有人開設咗一間名為「玫瑰園」旅館，專門為天體愛好者提供一個寧靜休閒嘅度假之地，讓大家盡情享受裸體嘅樂趣。
嚴禁性愛
據了解，玫瑰園為德國首家裸體旅館，共有三十一間客房，客人需要提早預訂房間方可入住。而但凡進入旅館範圍嘅人，都必須要剝光豬、三點盡露，除咗做愛之外，基本上喺旅館內都可以光脫脫咁進行任何活動。
玫瑰園老闆弗雷德．哈費爾科恩，出生於德國巴登符騰堡州（Baden-Wurttemberg），佢係一個醉心於天體文化嘅主義者，「裸齡」已經有二十五年。哈費爾科恩表示，為咗保持旅館清潔衞生，所有旅客都要喺椅子上鋪條毛巾或使用坐墊。此外，為咗避免發生性騷擾等不愉快事件，一律禁止所有性行為，如發現違反者，將會被即時驅逐離開。
哈費爾科恩又話，希望所有入住旅館嘅天體愛好者都可以暫時拋低情慾；相反，透過運動、遊戲及交流度過美好時光，無拘無束咁玩樂一番。另一方面，旅館不但歡迎個人天體愛好者，更希望天體家庭嚟到呢度感受大自然嘅氣息，輕輕鬆鬆享受愉快嘅裸體假期。