家陣啲頭髮護理產品，愈出愈專業，只要依法打理，就算生成鐵線頭嘅頭髮，都可以變得柔順如絲，再唔係，走去電個負離子都一樣得。至於天生頭髮又粗又硬，喺玄學上好定唔好呢？原來好多社會上嘅成功人士，頭髮都係又粗又硬嘅。特別係一啲事事親力親為嘅企業家，佢哋到咗幾十歲，都仲要日日返工，喺別人眼中，勞碌一生。
至於女士頭髮生得粗硬，原來都係辛苦命，事業家庭兩兼顧嘅話，會畀別人更辛苦，但喺佢哋嘅努力下，事業最終有成，家庭亦會得到幸福，加上眼睛清明，聲音響亮，喺古相書講，仲係旺夫之相。
梗係啦，以前啲書生乜都唔使做，只顧讀書，老婆係呢種人，除咗耕田種菜之外，仲包辦埋屋企裏面嘅大小工作，所以上咗年紀後，大多數女士都會有好日子過，無憂無慮地安享晚年。