28/10/2009

播放本新聞相關短片

天體會散工 鹹蟲爭住做

乜嘢係「天體運動」?相信大家都略知一二,總之就係剝晒衫褲剝晒鞋咁生活。香港第一間正式註冊嘅天體組織,係喺一九三二年正式成立,名稱叫做「香港天體會」,創辦人據稱係一名德國人。

由於已喺政府註冊,所以宣傳起嚟都好方便,佢哋喺當時嘅英文報紙刊登廣告,招收天體會員,經媒體炒作一番後,吸引大量洋人參加,人數由創會時嘅八人,增至百多人,聲勢一時無兩。咁大棚人可以匿喺邊度開天體派對呢?原來係喺一間私人大宅。

其實當年所謂嘅天體運動,真係大家赤條條咁行行企企,飲吓紅茶吹吓水,十分正經。大宅嘅主人雖然都有請工人,但要招呼一百幾十人,始終都有難度,於是每逢開派對,佢哋都會請十多名臨時工幫手。因為有免費金絲貓(目及),所以唔少人仆倒去應徵,畀工頭壓價都算,佢哋仲將職位吊高嚟賣,一個臨時侍應生,竟然要畀二十到三十蚊工頭至有交易,當時普通工人嘅月薪都係咁上下咋。但由於有金絲貓(目及),好多人都唔會計較呢幾十蚊,倒貼都一樣爭崩頭。可惜熱鬧嘅情況只維持咗一年多,最後只剩會員十零人,而呢間位於沙田香粉寮嘅大宅,更因為要興建水塘而拆卸。

達達