外國唔似香港咁寸金尺土，所以好多人都買得起花園洋房，可以享受種花種草嘅樂趣。不過，有時花園太大都唔係好事，因為打理需時，單係修剪茂密嘅青草已經要花好多工夫同時間。幸好嘅係，只要有錢就可以請工人代為處理，如果係美國人，仲可以請到身穿比堅尼嘅剪草女郎幫手添！
呢班性感剪草女郎除咗會着住比堅尼到訪之外，更會專業到帶埋剪草機以及吹樹葉機，因為佢哋除咗幫手修剪草地之外，仲會幫手收拾落葉，有佢哋出手相助，花園即時好企理！而且仲可以欣賞到無限春光，真係賞心樂事！
不過，呢種比堅尼剪草服務，收費一啲都唔平，每服務四分一畝草地就收七十五美元，即係要成五百八十幾港元！但係，買得起有咁大個花園嘅洋房，應該都唔會吝嗇嗰區區幾百蚊啦！
收費：75美元（1/4畝）
注意事項：服務期間為每年四月至十月，時間為朝早九點至晚上八點。