乜嘢人喜歡「打爛沙盆問到篤」？原來生有「雞嘴耳」嘅朋友，就最喜歡尋根問柢，而且仲包拗頸，小小事都要同人爭拗。所謂雞嘴耳，就係天生耳仔唔見耳珠，好似畀人削咗去咁樣，形狀尖尖哋，睇落真係成個雞嘴咁樣。生有呢種耳仔嘅人性格麻煩，好奇心強，喜歡同人爭拗，而且唔肯認輸，固執到不得了。家人朋友都好難說服佢，最好嘅方法，就係唔好同佢嘈，慳番啖氣暖肚。
由於冇乜朋友，所以成功只能靠自己，雞嘴耳嘅人因為唔見耳珠，所以難於聚財，就算努力奮鬥後，白手興家，成就自己嘅事業，但最後都難逃財散人安樂嘅命運，特別係喺年輕時。但相書話如果性格肯改，年紀漸大時，會有機會長出耳珠，改變運程喎！
達達