一絲不掛

話說阿輝早前去峨眉山旅行，並入住當地一間星級酒店。到咗夜晚，突然有個侍應拍門，話酒店附設一個「保健區」，提供正規按摩服務，阿輝見對腳有啲痠軟，於是答應跟隨侍應去到保健區。到達之後，阿輝發現內裏裝修豪華，女服務員亦穿着整齊。之不過，當入到房後，樣貌娟好嘅技師突然剝得一絲不掛，更不斷撫摸阿輝嘅重要部位，阿輝當堂大吃一驚，事關佢冇要求技師提供「手足服務」，因此立即嗌停。

被迫就範

技師見阿輝拒絕，就解釋話按摩收費當中已包括額外服務費，即使唔享用都唔會退還收費。阿輝聽後認為無謂蝕底，就繼續享受技師嘅手足服務，情到濃時更同技師翻雲覆雨，事後阿輝懶醒咁畀咗對方一百元人仔作貼士。

當佢諗住鬆人之際，技師突然要求阿輝多畀兩千元肉金，阿輝即時拒絕，點知技師立搵嚟兩位自稱經理嘅大漢入房，阿輝見勢色唔對，被迫就範，事後阿輝向酒店投訴，對方就話保健區係外判畀私人公司經營，唔屬於酒店管理範圍，如要投訴就要搵保健區嘅負責人，完全將責任推得一乾二淨。

據知，實情係酒店同保健區都係同一個老闆，所以擺明設陷阱屈客人，而許多時，客人為免惹麻煩都會畀錢走人了事。