今日同大家講吓「淚堂」，淚堂位於眼睛下面嘅眼肚位置，又稱臥蠶，無論男女，以豐潤飽滿最好，代表呢個人精力旺盛，才思敏捷，而淚堂喺十二宮相法中，稱為「子女宮」，主管一個人嘅子女，聽唔聽話，可唔可以成材，就睇呢度。
男人如果喺淚堂位置出現黑痣，代表性慾特別旺盛，容易出軌，而且縱慾過度，會有性功能衰退嘅問題出現；另外，要小心一啲先天性嘅疾病。除此之外，有此相格會刑剋自己嘅子女，如果痣生喺左眼，代表個仔有問題，生喺右眼，就係個女有問題。
生喺眼頭眼尾亦都有分別，生近眼頭，即大嘅仔女有事，生近眼尾，就係細嘅仔女有事。但所謂刑剋，其實只係你份人對子女太過溺愛，令外向嘅更加調皮搗蛋，內向嘅更加依賴怕事，所以終日都要為佢哋操心。