鼻尖又叫做準頭，代表四十八歲時嘅運勢，而準頭表示自尊心，據古相書講，男士準頭以圓圓哋有肉包住，感覺飽滿為最好，當一個人鼻頭有肉，即係佢着重自尊心，因此有唔輸得嘅心態，好識得動腦筋，所以可以從唔同方面搵錢，財運特佳。
但如果準頭又尖又細，又點解釋呢？原來呢種人自尊心一樣好強，而且頭腦靈活，但想法比較偏激，冇圓鼻嘅朋友諗法咁圓滑，當遇上棘手或者唔順心嘅情況時，脾氣馬上就會出嚟，而且喜歡跟人爭辯，所以相書狠批呢種人「難成大器」。
所以自尊心過強，有時會適得其反，有玄學家話「鼻頭有肉內心無毒」，咁如果鼻頭冇肉呢？會唔會內心狠毒呢？咁又唔係，只係呢種人會比較自私自利，而且為求目的，有時更會不擇手段，唔理其他人嘅睇法，所以呢種人，真係叻極都有限。