今日介紹英國一個新興玩意，就係裸男上門修甲服務，呢個玩意家陣喺當地十分流行，唔少女士都抱住好奇嘅心態，致電服務中心搵個裸男嚟幫自己修修指甲同腳甲，而有時女士擔心孤男寡女共處一室，必有損失，於是乎會約埋幾個好姊妹一齊喺屋企試玩。
但大家唔好心邪，呢個上門修甲服務係唔提供性服務嘅，所以女士們只係齋睇，想有下文嘅話，就要睇吓個男修甲師放工之後有冇時間喇！
至於點解會有咁嘅構思？原來係有私人技術學校，看準修甲巿場，於是招來大批學生入讀，點知畢業後班男仔全體搵唔到嘢做。於是負責人諗出呢條計，果然所有學生有得就業，而且收入比女修甲師高，而顧客嘅年紀群，由十八至七十八歲都有。但呢啲都係噱頭嘢，玩得多就會冇乜新意，負責人都同意，但就希望男同學除咗以裸體，仲會以技術嚟打動到顧客。
收費：10英鎊/小時（約HK$125/小時）
注意事項：男修甲師上到門，就會自動剝光豬，然後替客人修甲，期間，顧客不得跟男修甲師有任何身體接觸。