13/06/2009

播放本新聞相關短片

神州遊:規律性生活開心命長久

家陣醫學昌明,好多奇難雜症都有機會治愈,所以想長命百歲,已經唔係難事。不過,人類係貪心嘅動物,依然不斷尋求延年益壽嘅良方,但係大家又知唔知,其實只要多做閨房運動,就可以命長久喇!

據醫學家表示,大家嘅小弟弟同小妹妹就好似一部機器咁,如果長期唔用,將佢擺埋一邊唔理,就會逐漸退化,要促進生殖系統健康,方法就係多進行床上運動。

減少患癌機會

據調查顯示,超過百分之七十五男性到五十歲之後,都會出現不同程度嘅前列腺肥大徵狀,甚至患前列腺癌,都咪話唔得人驚!

不過,原來要預防都唔係冇計,研究人員曾搵嚟一班年齡五十歲以上男士進行研究,結果發現呢個年紀保持定期作床上操嘅男士,前列腺健床上康比已經唔願郁嘅男士好得多,原因係當男士征戰嗰陣,體內睾丸激素分泌就會增加,令佢哋嘅前列腺維持健康正常狀態,所以患上前列腺癌機會亦會細好多,即係話床上玩多啲,條命仔都可以玩耐啲。

清除有害物質

另有性愛專家表示,床上歡娛可以保持人體心腦血管健康,因為當你喺床上激戰時,心跳速率增加,血壓亦都會飆升,令你體內血液循環加快,而呼吸亦會變得急促,大啖吸氣,血液含氧量就會增加。當攜帶住大量氧氣嘅血液流到全身細胞、器官同埋不同組織嘅時候,你體內就會好似畀新鮮空氣過濾一樣,咁就可以將導致人體心腦血管衰老、疲勞甚至生病嘅有害物質統統排除。

性愛專家仲話,當你喺床上搞到翻天覆地嘅時候,仲會令全身膽固醇水平降低,亦可以轉化不良膽固醇傾向良性發展添!成日都有報告話膽固醇高係現代人嘅剋星,依家唔使騰雞啦,閂埋房門勤力開戰咪唔使驚囉!

幫助抗老化

有研究顯示,每個月唔逢一「潤」嘅人士,比起一個星期至少有兩次性事嘅人,死亡率竟然多出一半。原因係當大家同另一半作深入交流嘅時候,體內就會分泌出一種叫做青春素嘅東西,亦即係一種男女性激素合成前體,令你覺得更加興奮外,最重要係可以幫助平衡免疫系統、促進骨骼生長,兼夾保持人體修復組織維持正常狀態,自然令你身體冇咁易老化,咁死亡咪離你更遠囉!

娟娟