今次介紹嘅動漫作品，相信大家會比較陌生，因為呢套作品係一套三級漫畫，未出過單行本，只係喺○七年於《漫畫阿吽》裏面連載過一段時間，呢套漫畫就叫做《從宇宙來了》，而女主角就係性感外星人拉娜。
雖然《漫畫阿吽》呢本專刊登三級漫畫嘅周刊，每期都會刊登八至十個漫畫，但外星人拉娜就曾經做過一期封面，出街之後，令唔少Fans着迷，於是生產商立即推出有關拉娜嘅產品，最近就推出性感首辦模型，以滿足Fans需要。
由於拉娜本身係三級漫畫嘅女主角，所以造型師當然唔使同佢客氣，一於設計得有咁性感得咁性感，而最後決定，用番拉娜喺漫畫中嘅性感水着造型，將其驕人身段，完全表露無遺。同時拉娜手持死光槍，一臉得意嘅樣子，十分可愛迷人。當中令Fans開心嘅，就係拉娜身上嘅比堅尼，可以隨意脫下，等大家可以一睹拉娜近乎完美嘅胴體，係咪流晒口水呢？
售價：¥7,400（約HK$592）