12/06/2009

播放本新聞相關短片

與美女整餅

仲記得三年前,一部手提遊戲機大行其道,當中有一隻遊戲叫做《Cooking Mama》不知風靡幾多女仔。而小弟亦因此而努力儲錢,終於將遊戲機同呢隻遊戲買到手,更加成功奪得一個女仔嘅歡心,回望過去之後發覺原來好多女仔都鍾意煮番幾味。

如果大家都鍾意打機,又想學煮幾味嚟氹女仔,今次介紹呢隻《2度開放!美味糕點》就一定幫到手喇!呢隻遊戲嘅故事講述一位叫做結城曉人嘅年輕人因為早年仰慕名牌餅店「十月櫻花」嘅蛋糕,於是燃起學整餅嘅決心。可惜,學成歸來之後發覺十月櫻花嘅老闆死咗,只遺下兩個年輕貌美嘅女兒,仲發覺佢哋債台高築,於是曉人就決心幫助佢哋渡過難關,仲協助二女力抗其他餅店嘅夾擊。

而遊戲嘅玩法就係要玩家控制曉人經營十月櫻花,同時不斷研發特色糕點以吸引客人,而研發糕點嘅過程即係玩小遊戲,遊戲嘅趣味盡在於此。當然,此遊戲好玩又可以學到點整餅之外,仲可以同餅店嘅兩位姊妹溝通,增進感情之後就可以同佢哋發生關係。此外,對手其實唔止佢哋兩個,因為其他餅店嘅美艷索爆老闆娘以及女廚師都可以拜倒於玩家腳下,視乎玩家能唔能夠將整餅藝術發揮喇!總括而言,本作集烹飪、經營、溝女於一身,趣味同鹹味都相當高,不妨一玩!

遊戲名稱:《2度開放!美味糕點》

系   統:Win2000/XP/Vista

預定發售日:6月26日

預定發售價:8,800日圓(約HK$694)

Max