28/01/2009
文： P.Yeung
每逢年初三「赤口」，相傳會很容易與人口角。為防招惹口舌是非，一般人都不會出外拜年，但鍾健威（Ray）及譚凱琪（Zoie）兩個「外交家」均表示冇有怕，今日會照約朋友出外見面，還提議一起食甜品，吃得口甜舌滑，就唔會嗌交啦！
難得有假放，Ray及Zoie相約吃最愛的甜品，好好充吓電。Ray表示：「我親戚不多，通常年初一、二拜年，年初三便自由活動。」Zoie則在旁笑着附和：「我都係呀，年初一、二去親戚屋企，年初三便相約朋友去玩。」
天秤座人愛和平
傳統上，赤口日不宜與人見面，怕大家會嗌交，但這兩位年輕人笑言百無禁忌，並且會約朋友出街玩。Zoie說：「我平日很少跟人嗌交，天秤座的人愛好和平嘛！哈哈！但如果講到新年習俗，我記得小時候，每逢年廿八會用碌柚葉沖涼，不過長大後已沒有這樣做！而多年唯一沒變的，是每年都會買新衫同新內衣褲，裏裏外外都是全新，顏色紅噹噹就最好。」
Ray則說小時候都會跟足新年習俗：「例如會用碌柚葉洗邋遢，年初一唔掃地、唔洗頭，但現在已好少咁做。」而同樣是天秤座的Ray，當然也是「和平大使」，他說：「如果跟別人意見不合，我會講道理，所以是否赤口我都唔怕會嗌交。或者到時約朋友去食甜品，開開心心就實無事啦！」
食唔晒打包回家
不說不知，原來Ray是位甜品迷，笑言自己有幾個胃的他，飯後例必食甜品，既愛慕絲、布甸的滑嘟嘟，也愛拿破崙餅的香脆甜膩：「每次去食Buffet，都會先去甜品Counter巡視一下，之後才去睇其他食物。試過有次去朋友開的餐廳食甜品Buffet，食唔晒要打包回家，但卻因為放得太耐而變壞了也不知，結果屙嘔兩日，想起都覺辛苦，不過我並沒有因此對甜品留下陰影，哈哈！」
食到肚痛的其實不止Ray一個，Zoie說：「試過新年狂食年糕、蘿蔔糕，搞到腸胃炎，現在知道要適可宜止。我自己較喜歡吃鹹味食物，甜品是近幾年才喜歡吃，中式選擇愛吃楊枝甘露，西式則會揀朱古力慕絲、軟雪糕等，其實只要賣相吸引，我都會喜歡。趁住今日赤口，我祝大家甜甜蜜蜜，唔好口窒窒！」
查詢：（a）2733 2033（b）2113 0808（c）3175 3868（d）2733 2045
)
)
)
)
)