19/12/2007
文： 音樂組


上月完成紅館九場演唱會的郭富城（Aaron），荷包進帳千萬元，買車密度多過拍拖次數的城城，近日又再心郁郁「添食」，蒲車行睇跑車。

論愛車程度，城城敢認第二冇人會認第一，自九五年豪擲逾二百萬元買入第一架法拉利後，他從此對超級跑車情有獨鍾，去年城城為慶祝簽約大國文化，一口氣以千萬元連掃三部名貴跑車，十二年來城城愛跑車多過愛女人，先後購入十多部法拉利、林寶堅尼和保時捷靚車，總值逾四千七百萬元。上月城城假紅館舉行九場《舞林正傳演唱會》，收入已達千萬元，辛苦演出的城城，當然要買「大禮」獎勵自己。

上周一下午，記者發現城城撇甩緋聞女友熊黛林，現身車行內，雖然車行內有多部超級跑車，但城城那部掛上「KING 」車牌的炭灰色林寶堅尼Gallardo Coupe泊在門口，足以幫車行做「生招牌」，期間城城對一部鮮紅色的法拉利甚有興趣，職員落足嘴頭力Sell，還揭開車尾部分讓城城睇個夠，兩人談了數分鐘後，城城發現有記者在門外，即時戴上墨鏡然後隨職員走進辦公室繼續詳談。

約十多分鐘後，心情大靚的城城主動上前與記者寒暄一番，問到是否買車時，城城堅稱帶座駕「KING」來例行「Body Check」。不過，據知近日城城頻頻蒲車行睇車，若遇上心頭好隨時會擲數百萬買「新玩具」。

Aaron專用車牌
AARON：

以25萬投得，再配上Pagani Zonda（幽靈之子）

車價$10,000,000

SKY：

以22萬投得，放在Ferrari F430-Spider（限量版）

車價$4,000,000

KING：

以30萬投得，配以林寶堅尼Gallardo Coupe

車價$2,620,000